最近小飛也有跟公立醫院交手。
話說家中靚女咳咗幾個月，小飛覺得唔對路，最終把諱疾忌醫的靚女帶去看私家醫生。醫生診症後，懷疑靚女肺炎，立即寫紙照肺和照心電圖。
因為醫生覺得靚女比較嚴重，要求化驗所檢查報告立即出爐，之後醫生致電過來，話靚女個肺咳到花晒，心電圖報告就未出，要立刻送院再作詳細的檢查。小飛返去攞轉介信，醫生推介醫院係明X。
小飛心頭一凜，但醫生話呢個區最近係明X。冇辦法，小飛唯有同靚女去明X再照肺。家庭醫生話，靚女肺炎，需要打抗生素，所以必須入院。
小飛同靚女去到明X，公立醫院就梗係排隊有排排，
見到個醫生，唔好話我有 Halo Effect 嘅 Bias，我覺得個醫生係實習醫生。
醫生問靚女係咪要想住院，咁靚女就梗係話唔想，邊度有人話想住醫院㗎？
我問醫生。佢係咪要打抗生素，醫生就話唔一定要打嘅，都可以食嘅。照完肺之後，等咗一陣, 個姑娘話去攞藥就可以走。
我問姑娘，佢唔係要住院咩？姑娘話，醫生冇講話要佢住院喎！小飛覺得唔知係好事定唔係好事，唔使住院，即係唔係好嚴重啦！
咁就同靚女返屋企。
小飛唔識藥物，淨係知啲藥要食晒，醫生開咗兩種抗生素。抗生素療程係唔可以停。食咗三日，原本行得吓但氣喘嘅靚女，變成氣弱游絲，跌哂 watt，郁都唔郁得。
食到第七日，靚女已經虛弱到乜都唔想食剩係反胃。晚飯時，小飛仲同佢講，食埋夜晚呢一次抗生素就唔使再食，慢慢就會好㗎啦！
到咗半夜三點幾，靚女突然叫小飛，同小飛講，個心跳到好亂，個腦不斷轉，V宏宏V宏宏。小飛覺得好唔對路，就話不如入急症室，一直驚去醫院嘅靚女竟然肯。仲同小飛講：「我驚今次真係要離開你哋啦。」
見到靚女咁，小飛真係唔知講乜。只係諗，咳咋喎，點解會變成死呀？我係咪做錯咗？唔應該帶佢去醫院？
因為明X有佢嘅病歷，雖然小飛唔想，結果都係飛的去明X。
夜晚個駐院醫生睇咗佢嘅病歷，就話佢要入院，又再照肺。我話上個禮拜咪照咗肺囉，醫生話入院程序上係要再照肺同驗血嘅！咁靚女一個禮拜內就照咗三次肺！
個醫生仲話，唔知點解靚女冇入院，因為自從新冠疫情後，所有肺炎病人都必須住院。
你問我，我問邊個啊？係你哋嘅醫生唔駛佢住院喎！
雖然個醫生寫紙話要住院，但係等入院手續都等咗差唔多成粒鐘，一路都冇人理。呢個時候，細佬飛的嚟到明X。我同細佬講，唔係好對路，不如走啦！我哋轉去法國醫院。當我哋同姑娘講，我哋唔想靚女住院，姑娘就通知醫生，又走咗另一個醫生出嚟，話靚女個病好危險，肺炎喎，而且佢有心衰竭！
突然之間個病又變咗心衰竭！我覺得佢哋只係唔想孭飛。咁嚴重，點解一直要個病人等成粒鐘但冇人理。個病人話走先至咁講？
之後醫生就俾咗張「生死狀」靚女簽，係佢自願唔入醫院。簽完名之後，我哋就即刻飛的去法國醫院。
去到法國醫院，只有門診没有急症室，都係要照肺又要再做心電圖。不過當靚女照完心電圖，仲未第四次照肺嘅時候，明X醫院急 call，話驗血報告出咗，靚女低鉀，非常危險，一定要即刻返去醫院，必須住院！
呢次真係嚇死我哋，因為低鉀可大可小，法國醫院話靚女必須住院，但佢哋冇急症室亦冇病床，唔可以俾靚女入法國醫院。最後同姑娘商量，我哋話唔想佢入明x，姑娘幫手 call 白車轉送去QE。
QE其實屬於東九龍，因靚女個病歷喺西九龍，如果唔係私家醫院 call 白車，靚女可能都入唔到QE，而要返明X。
就係咁，靚女喺 QE 住咗八日。期間不斷輸血，不斷輸鉀，不斷照心電圖，不斷打抗生素, 而且做咗照胃鏡手術。
見到佢隻手打針打到入咗黑手黨，真係好心痛。
QE 醫生好好，不過啲姑娘就真係人手不足，病人叫天不應，叫地不聞。所以靚女好返少少，就話一定要出院。
雖然出院，QE都要求靚女返去覆診，再照胃鏡。八日住院駛咗 $960蚊。
因為靚女唔想返去，結果我哋帶佢去咗法國醫院，搵醫生同佢再照胃鏡，靚女住咗兩日一夜，駛咗成 $81,000 蚊 ！
呢個經歷其實都有啲奇，明明係咳, 結果變成心臟有事，低鉀，低血小板，仲照咗兩次胃鏡同腸鏡。
事後檢討。
大家都要留意吓自己屋企附近有乜嘢公立醫院，如果有急症嘅話，呢啲醫院你有冇信心？
如果你係唔想去嗰啲公立醫院，就要睇吓你屋企附近嘅私家醫院有冇急症室。好似我哋咁，附近嘅公立醫院，就只有明X同埋公主。如果兩間都冇信心，就要睇（私家）法國同埋浸會，但係法國醫院係冇急症室嘅，咁即係話，我哋只能夠揀浸會，因為浸會係有急症室。大家都要查一下屋企附近的醫院資料。
人係好化學嘅，希望大家平平安安，身體健康！
留言列表
