最近中國商務部都鬧鬼Walmart，因關稅戰走去迫啲中國工廠減價。啲工廠邊有咁多利潤，-20%根本就係黐線！
美國啲 Retailer 好賤格㗎，真係逼死啲中國嘅工廠！而家2月1號或之後到岸嘅貨，唔理之前訂單係點樣，都要廠家減價10%，唔肯減價就唔找數！完全冇合約精神！
另一種，而家就嚟要走嘅貨，佢哋唔俾貨運代理出落船紙，等你走唔到貨，一定要你就範減價10%，先至俾落貨紙你落船！真係無恥！
最近有個客仲衰，畀四日時間你考慮，如果你真係唔肯減價10%，包括走咗嘅貨，佢就話唔同你再做生意，你話啲中國商家或者廠家係幾慘呢！
有個仲衰，個客話你唔減價俾我吖嘛，即刻將所有訂單取消晒 ！
所以而家好多中國廠家都喺東南亞設廠，越南、印尼、柬埔寨比較多。我最近竟然有間廠，走去馬來西亞開廠，咁個美國客又話要去睇吓，話馬來西亞冇乜人權喎！又有強迫勞動喎！小飛就焗住去咗一轉馬來西亞。
今次去馬來西亞之前都有啲嚇親，因為工廠位於Port Klang Free Zone，有啲似大陸嘅保稅區，唔係話去就入去，一定要攞 permit，需要三個工作天，而且去到 Pass control 仲要擺低個護照！個護照 keep 喺人哋度，其實真係覺得唔係好安心。最麻煩就係，我入去唔止一日，所以必須要申請商務簽證，真係臨出發之前一個禮拜先知呢件事！好彩工廠幫忙，如果唔係要去攞商務簽證真係好鬼多文件，要工廠邀請信，又要公司擔保信，又話要銀行證明文件，非常麻煩，仲要五個工作天，最慘係趕唔切！
除咗小飛，公司仲有其他同事去，呢個先至係我覺得搞笑嘅地方。
話說個客人主要係做工廠審核同埋品質管理。我公司大陸嘅某個所請高層，竟然帶生產計劃同船務部嘅同事去，仲係臨時臨急叫人去，即刻買機票第二日飛，但係同事冇Permit ！結果去到馬來西亞，就成日喺Sheraton酒店度，去唔到工廠。到第三日攞到 Permit 先至去行吓遊花園。
小飛就唔夠人哋叻啦，真係走去 Port Klang Free Zone附近，四日三夜住咗一間好荒蕪嘅酒店。
好啦，到客人早上行完廠，晏晝就係 free time。工廠老闆已經急急飛返香港做嘢，咁小飛就返去自己酒店，無意間搵到一個小商場，都走去睇吓平民生活，咁當然唔係好似某高層佢哋咁，住喺市中心咁多嘢玩，咪就係小飛蠢囉！
最頂癮係，第四日，小飛一早出機場，飛返嚟香港。工廠VP車我去機場嘅時候，小飛八卦問，亞大陸所謂高層同兩個手下今日幾點鐘航班。點知工廠 VP 話，佢哋唔走住，玩多一日，聽日先走！仲未約我哋架車嘅時間！
其實亞高層飛嚟馬來西亞嗰日，突然通知工廠，架車去機場接機往酒店要預多兩個位，嗰兩個係乜嘢人呢？真係無從稽考囉。
仲有，大家都知道，出差食飯，就梗係食阿公㗎啦，明嘅！
小飛聽到眼都凸埋！真係做唔出！咁又係嘅，我曾經聽過一個在飛X浦工作的朋友講，佢每次出差，都會預留一日喺當地玩吓，仲帶埋老婆去，出差賺咗里程，用飛行里數 兌換機票, 機票都唔駛買。咁人哋係高層，公司都唔話佢，我哋有乜好奇呢 ?
咁都好，證明我公司真係好多錢，駛好多錢嚟養活我哋！所以我目前仲未被炒，遲 D就唔知啦！
香港真的很美 ! 朋友話係大欖涌水塘千島湖 
屯門原來係咁靚
Life is rarely a straight line 
去到工廠，見到有很多有意思的句語
小飛住在 Port Klang Free Zone 附近的 Prermiere Hotel，駕車也要半個小時才能到 Free Zone
酒店附近算荒蕪吧
天氣報告說這幾天陰天，還會下雨
第二天到工廠吃飯盒，無味
最騎呢係附送的蕃茄湯，用膠袋包住，這使我想起十幾年前和小峰拍拖返大陸，食飯叫了一碟蕃茄炒蛋，食唔晒，小峰叫夥計打包，夥計就係攞住一個薄 Chit Chit 嘅膠袋嚟，跟住小峰將蕃茄炒蛋倒個膠袋度，小飛睇到眼都凸埋！
小飛就問佢，點解唔攞餐盒？
小峰話，邊度有餐盒㗎？都係用膠袋㗎嘛。
中國而家已經進步好多啦！
晚上工廠 VP 飛過嚟，一落機就請我哋食晚飯，小飛最初唔知食乜，睇睇下就知道大鑊！呢一間日式餐廳，在香港上環都有分店。
呢一個米糕，顏色都好吸引，但其實冇味道
呢個斑蘭糯米糕，被譽為全場最好味嘅甜品
跟住啲牛肉就上場啦，今晚其實係Omakase，廚師發辦
小飛終於有嘢食，就係燒甜薯
跟住又係牛肉啦
VP 後來知道小飛唔食牛肉，就叫咗兩碟柚子燒雞同埋兩個帶子俾小飛食，小飛真係覺得唔好意思。其實小峰教過小飛，有啲乜嘢唔食就要出聲。事前出聲，唔好令到人哋同自己都咁尷尬，以後小飛都會聽教啦！
中間又有一個甜品，我估係類似寒天之類啩
帶子上場，真係好大粒炙燒帶子
小飛都好欣賞呢一個甜品，紅豆抹茶燒餅雪糕 
呢一餐， 我估計每人大約要港幣 $1500 - $1800 蚊落樓
餐廳位於 Wolo 酒店內
第三日早上行完工廠，晏晝就可以返酒店做嘢。酒店附近有一間AEON mall，不過係行唔到過去嘅，都要坐車，所以小飛冇去，就在酒店繼續吃飯盒。
據聞呢一個係海南雞飯，係嗰間食店嘅 signature。不過我就覺得唔係幾好食。
食完飯，就走出去行一陣
睇到我哋住嗰間酒店係乜嘢樣啦，個樣都幾靚嘅
終於發現原來酒店隔離有一個 Lotus 小商場，但係唔可以就咁過馬路過去，因為酒店入口位於平台路上，全部都係車行路，要兜個大圈花20分鐘先至落到去。
小飛對呢一個類似芝士波波嘅食物好有興趣，不過入到去KFC，佢話冇晒貨，冇得試
隔離有間麵包店，睇見啲蛋糕都幾靚嘅，不過喺外面就唔敢亂咁食嘢
商場裏面有一間好大，叫DIY嘅店舖，賣嘅嘢類似日之城。小飛睇中咗呢一隻多士爐，貪佢夠得意，即刻上淘寶。原來淘寶冇得賣，呢度只係$106.29 港幣，所以買咗返香港。
走去馬來西亞買多士爐，都驚俾人笑。
工廠 VP 請我食呢隻印尼泗水東爪哇蛋糕，非常好食，仲叫我打包返酒店慢慢食。
https://spikoeresepkuno.com/shop/products/spesial-tanpa-kismis
喺超級市場買咗呢啲零食畀屋企人 HK$92.69
地道小吃 HK$345.53
呢啲係工廠送俾我嘅手信
,
酒店對面有一個架空嘅車站，但其實行路走過去都幾遠， 第三日晚上天氣都算叫做好啲，有藍天, 但今日都睇唔到日落。
第四日要飛返嚟香港。朝頭早六點幾，見到都係厚雲，但係去到七點幾，就有日出嘅「曙光」。小飛就喺酒店房間睇日出，真係估唔到，有意外驚喜。。
唔係住喺市中心，但睇到一個好特別嘅日出，因為好多樹，又有厚霧，感覺竟然有啲似緬甸蒲甘。
對於小飛嚟講，出去買吓嘢，睇吓日出，等吓日落，先至覺得自己去咗旅行。所以呢次去馬來西亞，雖然冇睇乜嘢旅遊景點，但係都覺得自己去咗旅行。
堪輿學家嘅流年運程話，小飛今年驛馬星動，估唔到兩個星期後，小飛又要飛。 今次會去泰國行工廠，唔知又會見到啲乜嘢呢？
留言列表
