塞浦路斯、馬爾他 (5) - Day 5 三姊妹城市 (維托里奧薩、森格里亞、科斯皮庫亞) Vittoriosa, Senglea, Cospicua)

因為 Indigo 酒店位於一條小巷內，黑漆漆地出去海邊，小飛有點心慌。早上五時多醒來，到底出不出去拍攝日出？小飛非常糾結。

往露台看，對面是舊樓民居，街上一個人都沒有。

當小飛起身見到教堂那邊，天色泛橙，覺得日出就在那邊，即係唔近海啦，會睇唔到日出啦，不如懶啲唔好起身。原來這邊正是向海的方向。

懶惰的小飛都係覺得，不如繼續瞓覺，反正日日都有日出。

朦朦朧朧，小飛忽然想起冰島看北極光的事件。話說2014年10月，小飛走去冰島，因為眼瞓唔願起身，竟然發夢見到北疆團友 Rowena，畀佢話我唔好咁懶，嚟到冰島都唔出去望吓有冇北極光。小飛醒來出去，果然見到漫天北極光飛舞！這次還認識了同樣來自香港的 Raymond 和 Freda夫婦，到現在仍跟Freda通訊呢！自由行參加 local Tour 遇上同團，仲有聯繫。真係一種緣份！

話題撑得太遠，要撑返嚟。小飛諗諗吓，都係唔好咁懒，起身出去睇日出。

這時聽到汽車的聲音。咦！有人類活動喎！所以小飛即刻換衫走到海邊去。

好彩今次冇偷懶，因為這是今次旅行最後一次看到日出，原因是到了馬爾他後，會住在繁榮的 St. Julian's 區，係睇唔到日出日落㗎！

做人唔好俾咁多藉口俾自己。

太陽就喺呢個位出嚟啦

小飛用手機拍video ，zoom 埋佢嘅時候，見到有兩隻鴨仔行過，海嚟喎，咁冇理由有鴨仔嘅！原來係兩個晨運客。Zoom 到咁遠，水深只係去到膊頭下面，可以猜想啲水有幾淺。呢個海邊真係好正！啱我呢啲唔識游水嘅人。可惜我冇諗住游水，一個人唔好亂來。

呢啲唔係水波紋，而係海浪沖沙的沙紋，可想而知海水有多清澈。

返回教堂的廣埸，貓貓都來活動了

返回酒店的路上，見到這樣的路牌。乜塞浦路斯有海嘯？諗諗吓。係喎，海島嚟㗎喎，都要做啲預警工作。

今天下午會飛往馬爾他。往機場的路上，再見到鹽湖。塞浦路斯飛往馬爾他，需時兩個半小時。

馬爾他這個迷你海島國家，主要由馬爾他島、戈佐、科米諾三島組成，遊覽馬爾他，主要是看三城和三藍。
三姊妹城市是維托里奧薩、森格里亞、科斯皮庫亞 (Vittoriosa, Senglea, Cospicua)
這三座毗鄰的城市合在一起，形成了馬爾他的歷史中心，也為當初先後登陸馬爾他的各個民族、宗教團體以及騎士團提供了落腳點合防禦城堡。

馬爾他是一個環保城市，所以很多地方包括酒店和機場，都會看到這樣的水機，自備水瓶去加水。

三姊妹城市, 馬爾他島有 54 萬人口，48 萬輛汽車。

1722 年的建築

作一點點 City tour。走進城堡，其實街道和一般歐洲城市没有分別。

這裡也曾經是『冰與火之歌：權力遊戲』的拍攝地。

這座建築從前是法院，在藍窗上面會見到斧頭的符號，即是說，這裏會判死刑的地方。

Birgu 區 - 這間是馬爾他最古老的房子 Sicolo Norman House，相傳該房子在13世紀就存在，現在開放給遊客免費參觀。

藍窗下面的是信箱入口的裝飾

這是藝術家的家門

Maskra Art Studio gallery

因為是海島，所以居所的門柄，很多都以海鮮作裝飾。

Prince of Wales Own AD1891

城市共有三道拱橋，Arch of St John Bastion

遊完三姊妹城，返回酒店。這四晚將會住在 St. Julian's 區Bay Street 的 Be Hotel。酒店位於商場裏面，分A B棟。A棟有 reception ，B幢則有餐廳和泳池。所以如果要吃早餐和晚餐，必須走去商場對面的升降機前往B棟。B棟的住客，又必須往A棟 check-in check out。擺明是小酒店，但它夾在 Hyatt Regency 和 Intercontinental Hotel 之間，都有生存空間。