這一篇是八卦雜談。
五月下旬同家人去了一次澳門旅行。
去旅行，要求好天氣，但又怕曬；想有啲風，但係又唔好打風，又唔好落雨。這次去澳門覺得真係非常之好，因為該段時間天氣非常悶熱，有時又落大雨，卻剛在去澳門的一天有啲天陰，又有啲風而冇雨，覺得咁先係天公做美。
呢次旅行係由姨甥仔帶隊，佢話佢都有D熟澳門。咁我又有啲奇，乜佢成日去澳門咩？點知佢話，真係久唔久就會去一次。個細路仔又唔係去賭錢，咁去澳門做乜？
原來佢兼職做YouTuber。咁去澳門做乜？佢就講咗一個故仔畀我聽。
事先戴定頭盔，呢個係創作故事，故仔純屬八卦，如有雷同，實屬巧合。
話說E生原來細細個好鍾意追星，而且係韓星。逢有韓星嚟香港，由機場開始佢就去追，跟住將啲片上youtube。竟然又俾佢殺出一條血路，啲片有人睇，view數唔錯。而又因為韓星需要有翻譯員，所以精通韓文嘅X0小姐會做翻譯。
X0小姐成日見到E生出現，又乖又純，D片有人睇，所以招攬E生到佢嘅製作公司做兼職，起初都好錫佢。但係佢公司嘅工作人員都係大學生，唔抵得呢個中五靚仔得寵，所以整蠱佢，又講佢壞話。久而久之，X0小姐就冇咁鍾意E生，始終嗰一班大學生先至係員工，E生只係part-time。
最後E生離開咗間公司。
不過自己繼續追韓星。因為佢嘅view數比X0小姐嘅製作公司高，於是公司内有人獻計，走去搵黑客搞E生，hack入佢嘅Account，攞咗佢嘅密碼，搞到佢冇辦法上載影片。
呢件事搞E生報警，警方調查之下，原來個黑客，有咁啱得咁蹺，竟然係佢讀電腦班嘅同學！真係好似睇緊電視劇咁！所以有時我哋睇電視劇都唔好鬧啲編劇亂作。
啲警察話，係唔係你哋班細路仔自己喺度玩啊？只係純屬整蠱，如果唔告，就銷案算啦。
個黑客唔知道呢件事件已經曝光，返到學校，仲同班同學仔講，X0小姐間公司請佢做暑期工，叫佢做黑客，佢就成功咗入一個 YouTuber 嘅 Account，喺度認叻。其實佢都唔知道，原來個youtuber就係自己嘅同學。
E生好唔開心，自己辛辛苦苦建立嘅頻道畀人攞咗，但又係自己同學，就去同佢舅父訴苦。
佢個舅父仔其實都「有啲料」，所以幫佢睇吓發生乜嘢事。
揾咗一晚，佢叫E生入返自己戶口，去 set 密碼。黑客撞入，不斷咁修改E生個密碼，令到E生無辦法入自己個戶口。舅父仔喺另一端完全睇到晒個戶口發生乜嘢事。於是E生改密碼，黑客就改佢個密碼，咁舅父仔就係另一端幫E生修返正個密碼。如事者來回改咗五六次，個黑客先至突然覺得唔對路。跟住舅父仔 check 到呢個黑客有五六個戶口，以其人之道還治其人之身，走去改咗黑客D戶口嘅密碼，嚇到黑客魂飛魄散，唔敢再搞E生個户口。
第二朝返到X0小姐公司，黑客就話，唔好再搞個YouTuber啦，佢後面有高人㗎！咁樣X0小姐間公司先至放手。
舅父仔真係高人嚟㗎 ! 佢係某國某大型電腦公司 IT部嘅 "大碌柴" 。......
唉，呢個世界，原來真係誰大誰惡誰正確。
*********************************************************************
因為姨甥成日追星，所以有啲韓國嘅製作單位，遇上有演唱會，都會送飛俾姨甥，就係呢個原因，姨甥有機會去澳門睇演唱會。
RAIN CONCERT : STILL RAINING - MACAO - 2025年4月12日 倫敦人綜藝館
今次我哋五月去澳門非常Hea，喺威尼斯人酒店都玩咗幾個鐘。百無聊賴，雖然係即日來回，都叫做攤唞吓。
去澳門最有印象嗰次，係參加東歐團友荳兒嘅婚禮，佢住澳門，咁我同死黨 Winnie 過大海去飲，婚宴後在澳門住咗一晚。
呢條走廊隔籬就係安德魯葡撻店，荳兒話，安德魯嘅葡撻係最好食嘅！不過我哋去到就未開門，唯有去咗對面嘅舖頭，買咗個葡撻嚟食。
大酒店有 food court 方便遊客。食完午飯，我哋就去威尼斯巴黎人逛逛。呢條係 LV專屬 display 走廊。
既然係巴黎，除咗有LV之外，仲有鐵塔。
舊年先至去咗巴黎，攀上真正嘅鐵塔。呢個係仿製品，上去玩就有啲騎呢。不過弟妹未上過，咁就大家一齊上去玩啦！總共37層，我話唔係好高啫，但係上到去，真係好大風㗎，猶其係呢日陰天。D風吹到頭都甩㗎！
好鍾意呢兩座建築物嘅設計
今次上去鐵塔，因為冇其他遊客上去，我哋成家人玩晒，影相玩咗好耐。到我哋落嚟嘅時候，大陸旅行團隊殺到，我哋都話好彩！落返嚟，係咁以影幾張相，就去大三巴逛吓，食豬扒包。
姨甥仔介紹呢一間抹茶店，佢話小紅書介紹呢間。非常之正。雪糕我就冇食，但係呢個脆餅真係正到暈，食到唔停得口。
今次澳門之行都有啲評語，
第一就係以前去十月初五街，有好多賣嘢食嘅舖頭，原來而家冇晒，可能搬晒去大三巴，或者比集團式經營淘汰了。但係嗰啲集團舖頭，手信都幾貴。而且好多係間舖頭只係個名似，根本就唔係正店。好似有一間舖頭叫鳳城，只此一家，係一間老字號，就出現咗老澳門鳳城，老鳳城……
第二係當佢哋秤豬肉乾嘅時候，好多時詐詐諦諦剪多一倍，搏啲遊客唔同佢計較。
第三係而家啲的士司機都仲係兜路，當啲遊客唔認得路。呢一樣嘢，我就真係好覺得同香港一樣討厭。
