因為太久沒有睇書，覺得自己語言無味，面目可憎。咁旅行都係一種長知識嘅方法嚟嘅。
好想去旅行，𣎴過又冇假期。
身邊好多朋友已經退休，有啲仲提早退休。見面嘅時候，佢哋都問小飛幾時退休，有啲仲以為我退咗休㖭！
其實我都想唔使返工，不過又要有錢。小峰就極力反對我退休，因為做一日和尚敲一日鐘，就會有人工。做多一個月，就有一個月嘅盤川。
我話返工日日睇email，成二百幾張，好煩。
佢話：「當你一個月返22日工，當你有＄44000蚊人工嘅話，咁你一日就有$2000蚊人工喎！日日睇二百張email，一日二千蚊，即係$10一張email，你click一下就有$10蚊，click 吓又有$10蚊，你話幾鬼開心呢！」
我真係第一次聽到啲人咁樣嚟到計數，好多時同小峰鬥嘴都鬥唔過。
最近發生一件超級烏龍嘅事，話說 Dada想睇 Kooza，馬戲團7月13號最後一日表演，睇馬戲依家嘢，都唔會一個人去睇。咁我話，好啦，同你一齊去啦，但係佢就叫我去買飛。
真係唔知米貴。原來Kooza都要成千蚊一張飛，分有金區、白金區同VIP區。VIP 仲要 $1888，白金區就 $1090。我哋又搵唔到折扣。嘰嘰搞搞，有時間去睇嘅嗰一場，剩係得返VIP飛。於是又同 Dada傾吓，又喺Trip.com個網頁撳嚟撳去，再睇時間同價錢。最後 Dada話，是但啦，VIP 就 VIP啦！
咁小飛就撳掣，畀錢買飛，買完飛之後，先發現原來剩係買咗7月13號下午4:30一張飛！
於是小飛喳喳林補鑊，即刻買多一張飛，點知畀完錢之後，先發現嗰張飛係下午1:00場次！
小飛都未試過買飛買到咁論盡，連續錯兩次。好在1:00嗰場畀咗錢但仲未確認，於是小飛立刻取消，再次買返4:30嗰場。但係臨別秋波，啲飛好搶手，最尾係買唔到！畀trip.com取消咗個訂單。
於是，就剩番 Dada「戇怴怴」一個人走去睇馬戲。
好彩好好睇，同埋 VIP 有嘢食有酒飲，仲好好味。
咁小飛都要同 Dada 陪罪，所以夜晚請咗佢食飯同埋去佢最鍾意玩嘅摩天輪。
香港，其實真係好靚㗎！
